If the words not displayed correctly, right click on the page, and from the menu, choose "Encoding" then change it to "Unicode(UTF-8)"
السلام عليكم و عدنا بعد ما ربك ستر و نفدنا من الحبس :)
و بعد حكايتنا السابقه عن الشقيق العربي و السباق العجيب مع الشباب الأرعم
هاجر الشباب الأرعم لإحدي دول البترول...علشان يعيشوا و يأرعموا بقي زي ما هم عايزين
بس علي مين...هي فيه زيك يا مصر يا غاليه...دي حتي مصر أم الدنيا و اللي فيها
و للآسف قصتنا اليوم هي من النوع بتاع حدث لامؤخذه بالفعل
يالا بينا نبتدي....
أدي عم حوده كعادته قاعد و بيهش الدبان من علي وشه...و شويه يعدل الطاقيه الصوف اللي لابسها في عز الحر..المهم قاعد لا به و لا عليه...
و علي فجأه كالعاده جيه صوت الواد عضمه صبي المعلم عكوه الجزار: إلحق يا عم حوده؟
عم حوده: يا حفيظ يا رب, إنت تاني يا عضمه؟ يا بني مش كده أنا رجل كبير و مش حمل خضه.
عضمه: معلهش يا عم حوده. أصل الموضوع مهم قوي.
عم حوده: خير يا سيدي؟
عضمه: إبسط يا عم حوده قبضوا علي الشباب الأرعم, اللي إنت قلت لي عليهم في الحكايه بتاعت السبق؟
عم حوده: أولا اسمها أرعن يا عضمه, إفهم بقي؟ و بعدين أنا أكيد كنت هعرف يعني...
بس إنت سمعت الكلام ده فين؟
(و الخبر طبعا جديد علي عم حوده, أصل عم حوده ما بيقراش غير الجرايد القديمه, و الخبر ده لسه طازه و بنار الفرن يا أخبار...)
عضمه: يا عم حوده. أنا شفتها بعنيه دول علي التفلسيون.
عم حوده: الله أكبر, قولي إزاي يا واد يا عضمه و فين قفاشوهوم ولاد الإيه دول؟
عضمه: أنا حافظ اللي المذيع قاله بالظبط يا عم حوده...و كرر عضمه النشره بشكل غريب...طبعا هو كل يوم بيشوف شباب أرعم؟؟
المذيع قال:
تم القبض علي عصابه الشباب الأرعم المتهورين...و هم حسب ظهور الصور كالتالي:-
ميكو العجيب: زعيم العصابه و الممول الأول و الوحيد للسيارات المستخدمه في عمليات الأرعمه
(مكتوب تحت الصوره "تعلن محلات ميكو عن تأجير جميع أنواع السيارات عاده و أوتوماتيك...بمجفف و بدون")
إيكو الزئبقي: نقطه الضعف في العصابه و اللي وداهم في داهيه...
(مكتوب تحت الصوره, "طول ما فيه طيبين هكبر و أترعرع علي مص دمائهم"
"و لبس صاحبك و طير له رخصته, أهو بكره يتنصح ويفوق لعملته")
دندن المسكين: ضحيه كل عمليات العصابه...
(مكتوب تحت الصوره, "يا ما في الحبس دنادين",
"و إبعد عن المبتدئ و غني له, و لو ما أخدش الرخصه المره اللي جايه إبقي إدعي له")
عضمه: و كمل المذيع قصه القبض علي العصابه بقي يا عم حوده و قال.
المذيع: و بدء إيكو المسجل خطر التخطيط للعمليه بإختيار الضحيه...
ووقع الإختيار علي حلم صديق هندي مسكين, كان يستأجر سياره ليخرج و يتفسح مع أهله الهنود الغلابه, و لكن الذئب البشري سعي لتدمير سعاده هذا الصديق و اللي إسمه "مافي مفهوم"
و طبعا قام بوضع الخطه بدون علم المعلم ميكو...و قال لدندن الغلبان...
"خلينا نكبر بقي, فلن أعيش في جلباب ميكو"
و حيث أن دندن لم يشاء أن يترك هذا الشاب الأرعم الناشئ يدمر كل شئ و خاف عليه من غضب الرايس ميكو...و اللي كان بيخطط لمستقبل إيكو, و كان عايز يجوزه بنته الفاتنه الجمال...
التي يتصارع علي قلبها الكثير من الشبان...و منهم كاتب الحواديت نفسه..
خصوصا بعد ما أتعلمت تضحك و تقهقه و ربنا يبارك....
لكن إيكو أراد أن يعض الإيد اللي إتمدت له بمعلقه الشوربه السخنه...و لمته من برد الشتاء...تيرا تيرا, تيرا را...(موسيقي حنينه و الدمعه تفر من عين إيكو)
و قام إيكو الزئبقي بفعل غريب في عالم القياده الأرعميه, حيث جعل السياره في وضع غريب جدا, بحيث أدهش الجميع, و أخذوا يتسائلون, هو عملها إزاي دي؟
هذا و قد تم القبض علي العصابه متلبسه, بعد أن قام السيد إيكو الزئبقي بنهش الحلم الجميل للصديق الهندي و ركل سيارت الهندي بلامؤاخذه مؤخره سيارته, ثم هرب من أرض المعركه...
و قام الصديق الهندي بإبلاغ الشرطه...
و ترك إيكو, دندن المسكين صامدا كالبطل الصنديد في أرض المعركه, محاولا أن ينقذ ما يمكن إنقاذه.
و الإتفاق مع الصديق "مافي مفهوم" من منطلق "يا دار ما دخلك شر, و إيكو خلاص هرب فخلينا نوصل المركب للبر"
و قام السيد دندن بالإتصال بالراس الكبيره, علشان يستسمحه و يجي بردوا يصلح غلطه زميلهم الأرعم و أهو ضل ميكو و لا ضل حيطه...و يزودوا الإحتياطات الأمنيه و يعملوا غطاء جوي مكسف علي المنطقه لتضليل العداله.
و جاء المعلم ميكو العجيب, بسيارته الصاروخيه الغاليه قوي قوي. (علي قلوب حبايبه و بس)
و شويه حركات و كل شئ ماشي في السليم و الخطه محكمه...
وجاءت الشرطه و دندن يكمل التمثيليه بذكائه و صموده كبطل...
و علق المذيع و هو بيطلع لسانه: "و لكن ما فيش جريمه كامله يا اسطاوات"
و في حين كان الحاج ميكو مشغول جدا بمحاوله حل اللغز العجيب اللي كان عمله السيد إيكو بالسياره,"معضله و لا بتوع أرش(لامؤخذه)ميدس"
و لكن فعلها ميكو كبطل في سباقات "الفول ميوكا وان, علي اسمه (ميكو)"
فقد ظهر في الصوره فارس من الأفلام الهنديه المحبوبه لدي البسطاء, و قالها بأعلي صوته:
"ناهي, ناهي" (لا لا يعني)...هذا صديق طويل ما كان يسوق سياره, هذا صديق مال هو يهرب و يترك سياره. مهراجا مهراجا
(شخص رخم رخم بصراحه يعني, بس هو ممكن كان فاكر إنه بقوم بالواجب مع أبو دندن...فنشن الفالح و نشانه صاب)
و تغير الموقف, و إنقلب السحر علي الساحر. و إحمر وجه ضابط الشرطه و طالب بحضور المجرم الهارب و إلا سيتم تقليع السيد دندن و وضعه علي حمار و وشه للذيل...
فتشاور دندن مع الراس الكبيره (بروس ميكو)...و طبعا إعترف دندن بكل رجوله و أسرع من البرق علي صاحبه و حبيبه...(أصل دندن بصراحه ما بيحبش الحمير, و لو مفروشه حرير و هييييه)
المهم تم استدعاء المجرم و قامت الشرطه بوضعه في مكانه المناسب في سياره الشرطه...
إعدادا لوضعه خلف القضبان...
و ذهب بقيه أفراد العصابه إلي قسم الشرطه للإعتراف علي زميلهم
ليتم تطهيره من خطاياه السابقه (زي الإشاره اللي كسرها قبل كده)
و طالب السيد ميكو بترويق الزميل إيكو و الضغط عليه ليعترف (رجل رجل حقيقي)
و لكن بدهائه المعتاد كذئبقي إتمسكن لحد ما إتمكن, و لولا ستر ربنا,
ثم طيبه قلب الشرطي و دعاء الوالدين...
و مساعده الرجل الهندي الصديق "مافي مفهوم" اللي قعد يتحايل علي رجال الشرطه
علشان يسيبوا إيكو
(و لم تتضح بعد العلاقه بينهم, بس شكل إيكو كده, كان بياكل مانجا هندي كتير, أو كان بيتدرب علي ركوب الأفيال)
و خرج منها إيكو زي الشعره من العجين..و لحوس رخصه أخوه دندن في الطين...
حيث تم ترك المجرم عتيد الإجرام يرحل و تم تدبيس المسكين دندن...اللي لسه واخد الرخصه من أقل من شهر...(ولسه الفلوس اللي صرفها عليها مابردتش)
فجعلوا دندن مجرما...(و شويه موسيقي مؤثره لبرنامج ماوراء الأسوار)
و تتر مسلسل ذئاب الجبل
"و لابد من يوم معلوم تترد فيه المظالم...أبيض علي كل دندن, بمبه علي كل إيكو"
و أعلن المذيع تحذير هام للجماهير: تنبيه هام لكل الساده قائدي السيارات...
اللي يشوف إيكو, يهرب و يروح علي بيتو...العمر مش بعزقه يا أخونا...فالإيكاويون قادمون
كما ترفع الجماهير الأيدي بالدراعه لكي تعود رخصه دندن إليه بسلام
أصل هم بصراحه مطلعين عينه, و من هنا لهنا و حاجه تقرف....و كلنا معك يا دندن...
و طبعا الكل بيسأل مين البطل الأسطوري اللي فيش العمليه كلها؟؟
بصراحه ماحدش يعرفه..حتي الصديق الهندي "مافي مفهوم"...
ظهر و ضرب ضربته ثم إختفي...فإستحق بجداره لقب "الهندي مبيد الأراعيم"
عم حوده: يا سلام يا واد عضمه. شفت بقي مافيش جريمه كامله. و المجرم لازم يتجاب.أومال إيه.
و الهدف ياواد يا عضمه الجريمه لا تفيد...حتي لو كانت العربيه معموله من الحديد
و كل حادثه و إنت طيب يا إيكو يا طيب
يا للي بهدلت رخصه دندن في الأمد القريب, يا
يا إيكو يا طيب...
و طبعا نختم بجملتي الشهيره له...
"يا واد يا إيكو....إنت يا واد, إنت لسه ماروحتش تجيب العيش من الفرن يا واد؟؟؟"
