عم حوده الكينج و عيد ميلاد جونجون

If the words not displayed correctly, right click on the page, and from the menu, choose "Encoding" then change it to "Unicode(UTF-8)"

إقرا المقدمه علشان تتعرف بعم حوده...يالا الكينج مستنيك

أدى عمنا حوده الكينج الجميل قاعد قصاد المحل بتاعه و العيال الصغيره عماله تلعب في الشارع
و قعد عم حوده يتأمل في رجليهم الحافيه و متوسخه من اللعب...و و
عموما ده مش موضوعنا...هنبقي نناقش الموضوع ده في طالعه تانيه لما نبقي نعمل إعلان لمحلات باتا

المهم شويه كده و عمنا حوده شاف الأسطى لمبه اللى زي الحيطه جاي و شايل شويه لمبات ثوغنطاطين
و الواد صبيه كوبس شايل السلم و يا عيني هيتفعص تحت منه...
المهم الأسطى لمبه دحرج المسا علي عم حوده الكينج كبير المنطقه...
وقال: مساء النور علي سلوكك يا أجمل كنوج المنطقه
فرد عم حوده عليه و قاله: إيه يا لمبه يا خويا...فينك ما حدش شايفلك سلك و لا حتى فليشر, هم قطعوا الكهربا عنك و لا إيه؟
فضحك عمنا لمبه و قاله: لا يا عم حوده...هو تلاقي بس الفولت كان عالي شويه,فسلك التنج لامؤخذه ستين إتحرق
فقام عم حوده و ضرب الواد كوبس على قفاه علي سبيل التحيه...و سأل معلمه لمبه: ألا أنتم رايحين علي فين كده؟
فقاله الأسطي لمبه: و الله يا عم حوده الأستاذ ميكو اللي ساكن علي ناصيه الحاره..عايز يعلق شويه كهارب..
فقاله عم حوده: أه...الرجل ده سكره, يا لمبه يا خويا..و تحس كده إنه مش من بتوع الحاوارى...مش عارف إيه اللي جابه المنطقه هنا, ألا يكونش داسوس؟؟

فقاله الأسطي لمبه: و الله يا عم حوده الرجل ده زبون قشطه
و إيده فرطه (وتقدر تقول مخرومه يا أسطي لمبه)
و دفع لى تمن الكهارب و البقشيش كمان قبل ما يطلع من باب المحل,و عموما إحنا اللي علينا نعلق له الكهارب و ملناش دعوه..داسوس...دا نمل...مش موضوعنا

فسأله عم حوده: طيب قولى هو هيعلق الكهارب دي ليه يا أسطي لمبه...
فرد عليه الواد كوبس و قال: يا عم حوده ده عقبال أمالتك كده..النهارده عيد ميلاد بنته القموره الأستاذه جونجون
فبرق عم حوده و قال: جون جون...إيه ده؟ هو الأستاذ ميكو كان مذيع كره و لا إيه...لا ده لو كان كده بقي, يبقي أنا هحترمه قوى...أصل أنا مش بفهم غير في الكره و السياسه...

المهم عمك لمبه حلق لعم حوده علشان يشوف أكل عيشه..و قاله: بقولك إيه يا عم حوده, أسيبك أنا بقي علشان ألحق أعلق الكهارب...

و مشي الأسطي لمبه و صبيه الواد كوبس و هم بيغنوا و يترقصوا (أخر مسخره)
هنعلق البنور الليله ليله جانا...قالوا لي مين حبيبتك قولت حبيبتي هي جانا...و هنعلق البنور الليله ليله جانا

المهم عم حوده العمليه لعبت في دماغه و قام جاري علي المحل بتاعه
و جاب له كام إزازه شاربات من النوع الفاخر و طلع جرى علي بيت الأستاذ ميكو
و قالك أهو معرفه الميكوز كنوز...

و طبعا طنش الأسطي لمبه و صبيه...و دخل علي البيت علطول و خبط
و قال: يا أستاذ ميكو يا عتره..يا أستاذ ميكو يا داسوس

فطلع له الأستاذ ميكو بهدوئه و هو مبتسم كعادته، أصل كل بتوع برج القوس كده...علطول مبتسمين ما تعرفش ليه؟؟؟(إعلان علي الضيق كده, الكاتب برج القوس هو كمان)

المهم الأخ ميكو قاله: مين؟ عم حوده الكينج الكبير...و الله شرفتنا بحضورك..
فاستغرب عم حوده و قاله: إيه يا بني هو انت تعرفني منين؟؟؟
فقاله الأستاذ ميكو: أعرفك..إلا أعرفك...ده أنا أعرفك و أعرف اللي بيكتبك كمان

فاستنكر عم حوده وقاله: اللي بيكتبني كمان...أنا ماحدش بيكتبني...أنا حقيقي...أنا ما حدش بيكتبني...أنا ديفيد ...قصدي أنا حوده...أنا حوده
وقعد يا عيني جنب الحيطه يعيط...أصله إكتشف إنه مش حقيقي زي ما هو كان فاكر..
و هو يا عيني اللي كان بيضحك علي الواد بتاع فيلم AI...(الفيلم إخراج أكبر أسطوات و يهود هولي يود...الأسطي سبل لأمواخذه بيرج)

و قعد عم حوده الكينج يعيط و يرفص في الأرض...
لحد لما طلعت له البلو فيري(الجنيه الزرقاء)الست جونجون و الشهيره بجانا
و كانت لابسه الفستان الأزرق و ماسكه البتاعه اللي فيها النجمه دى(من مصانع الهلال و النجمه)..و طايره فوق الأرض
(معلومه الأستاذ ميكو دخل علي جوه و بيحرك جونجون بالريموت دلوقتي)

و قالت بلو جونجون لعم حوده: إيه يا ام اوده..؟ بتأيط ليه؟؟
فقالها عم حوده: البلو فيني؟؟؟ إنتي فين من زمان ده طول الفيلم عمال أدور عليكي و اتاريكي هنا عند الأستاذ ميكو...
فقالت له: أصل أنا بنته...و ما تزعلش يا عم أوده ...أنا هحقق لك كل أمنياتك...تطلب إيه؟
فقالها: أنا عايز أومي..(أمه يعني)...

و إنخرط في بكاء شديد...و هو بيغني ست الحبايب يا حبيبه..يا أغلي من جوز خالتي...يا حنينه و كلك طيبه...ما تجيبي اللى عليكي يا أمي...

فسألته جونجون: و هي راحت فين يا عم اوده؟
فقال لها: ما عرفش, هي سابتني عند المراجيح و أنا ثوغنطط...و قالت لي هرجع لك تاني...و راحت تضرب بومب

فضحتك جونجون و قالت له: تيب معلس...أنا ممكن ارجعهالك تاني يا ام اوده...
فبطل عم حوده عياط و قال لها:بجد يا خاله جونجون..ممكن ترجعيها لي تاني؟
فقالت له: تبعا..هو أنت فاترنى مس هارف...ده أنا عندى سنه بالها...
(الترجمه: طبعا هو انت فاكرني مش هعرف..ده أنا عندى سنه بحالها)

فقال لها: طيب هاتيها..
فقالت له: ماشي بس أنا عايزه أي حاجه من ريحيتها يا عم حوده...
فقالها عم حوده: زي إيه يعني؟
فقعدت تبص شويه لفوق و شويه لتحت, أ صل لسه رقابتها ما جمدتش و الريموت اللي مع الأستاذ ميكو كان بطاريته ضعفت...
و قالت له: يعني ...ضافر..شويه شعر...أي حاجه؟؟؟
فقالها عم حوده: أه..هو صعب..بس أنا فاكر مكان ماكنه الحلاقه اللي كانت بتاخود بها دقنها وشنبها...
فقالت له جونجون: أم إيه دي يا عم حوده اللى بدقن و شنب...إنت عبيط؟؟؟
فقالها عم حوده: أصلها كانت ست بألف رجل...
فقالت له جونجون: لا يا عم حوده...عيب عليك مش عارف تجيب أي حاجه من ريحيتها...ده أنا بابا المستثمر و رجل الأعمال الكبير...خلفني و علمني إزاى اجيب الحاجات من الهوا..
فقالها: إزاي يعني؟
فقالت له: يعني هو مثلا خلفني و بيلم علي هدايا دلوقتي...و تخيل يا عم حوده...يقولك إيه..طلبات جانا؟؟ ...بذمتك يا عم حوده...أنا لسه بعرف أتكلم علشان يبقي لي طلبات؟
فقالها عم حوده: أومال إنتي بتتكلمي إزاي دلوقتي؟

فقالت له: يا عم حوده إحنا دلوقتى في قصه من خيال لامؤاخذه الكاتب...و إنت عارف الكاتب بتاعنا أصله رايق و شكله ما عندهوش لا شغله و لا مشغله...غير إنه يدوشنا معاه...
فعادي يعني...ليس علي الكاتب حرج...
أما بابا, فأنا شايفه إنه مش مفروض أبدا يطلب هدايا بإسمي علشان ينال عطف الجماهير...و إنت عارف يا عم حوده, الكاتب متعقد من موضوع الجماهير ده...(راجع حدوته الداستور يا سياد)

و استرسلت و قالت: و كمان يا عم حوده يرضيك ياخود اللعب و الحاجات اللي الناس تيجبهم لي و يبعها من ورايا؟؟؟
علشان الشركه اللي هو فيها بتأخر المرتب؟؟؟ و كمان يعمل فى, زي ما المديرين بتوعوه بيعملوا فيه و يديني وعود في الطراوه و يقولي يا عم حوده...
بكرا تكبرى يا جانا و أجيب لك بدل اللعبه عشره...و أسفرك مشاريع كتير...و أعلمك و أدخلك مدرسه؟؟؟
هو كان بمزاجه أصلا يا عم حوده؟؟؟ يرضيك الكلام ده يا عم حوده...

فقالها عم حوده: لا يا بلو فيري يا ختى...بس هو أنا مال أهلى..أنا عايز أروح لأمى...
فقالت له: خلاص يا عم حوده...هات أزايز الشاربات اللي في إيدك..وهات عشره جنيه و لا أقولك خليهم بالدولار
و ورح نام خميس و جمعه و تعالى فايق يوم السبت...و بعد كده إبقي تعالى خودلك جزره...قصدى حته جاتوه...و أنسى موضوع الست الوالده ده دلوقتي

فإداها عم حوده الفلوس و الأزايز...و مشي و هو بيعيط...و دخلت جانا على الأستاذ ميكو و مامتها و الأتنين أخدوها بالحضن...علشان هى اشتغلت عم حوده اللى مدوخ المنطقه كلها...
و كمان أكتشفوا في بنتهم الموهبه الفذه اللى هتأهلها بإذن الله لتصبح مدير ناجح, من النوع اللي بيعرف يوزع جزر و يضحك علي البراميج الصغيره

و هابى بيرس داى تو يو....هابى بيرس داى تو يو...
هابى بيرس داى تو جونجون.....هابى بيرس داى تو جانا...
و يا رب ألاقي بكرا فيه جاتوه...عارف يا ميكو لو ماكنش فيه جاتوه...
هابى بيرس داى تو يو...هابى بيرس داى تو يو...
و يا سلام لو يبقي فيه عصير...و لا ورك فرخه و لا فطير...
هابى بيرس داى تو يو...جانا...و سنه حلوه لي أنا كمان (هو يعنى الكاتب بن البطه السوده)

و كل سنه و إنتى طيبه يا جانا بعيد ميلادك الأول من عمك حوده الكينج...
و من أخوكى برموج الصغير كمان..

و تعلن محلات عم حوده الكينج عن أكبر تخفيضات في الأسعار في تاريخ سلسله المحلات
بمناسبه إتمام الأستاذه الفاضله جانا أحمد رضا عامها الأول,,,
و أوعى وشك و الباب يا محترم

بلوحه مفاتيح...عدنان القماش

عم حوده الكينج يقولها إلا رسول الله

If the words not displayed correctly, right click on the page, and from the menu, choose "Encoding" then change it to "Unicode(UTF-8)"

إقرا المقدمه علشان تتعرف بعم حوده...يالا الكينج مستنيك

عمنا حوده الكنيج الجميل قاعد علي الكرسي الحصير بتاع القهاوي الشعبيه
و عمال يهز في رجليه كأنه قاعد علي شاطئ المياه في أرض الجمال و العري
(شرم الشيخ, قبله السياح العريانه من أرجاءا الأرض)
فهنيأ لك يا عم حوده..المهم بقي عمنا حوده عمال يتغني ببيت شعر اللي انا
كاتبته و هو (يا أمه كالنعاج صارت..أحلم بزمان جديد)
فالمهم بقي علشان ما طولش عليكم أصلي مقهور و الله الأعلم

سمع عمنا حوده اتنين عمالين يولولو و الست عامله زي فيلم عنتره بن
شداد...و قاعده تقول:
رسموك يا قلبي...أهانونا يا قلبي...أهل البقر و أكيد الصهاينه معاهم يا قلبي

و تشيل التراب من علي الأرض و تحوط علي راسها
و جنبها رجل غلبان قوي قاعد يا عيني متكوم علي الأرض...ودافن راسه بين ركبتيه و جسمه بيتهز من كتر البكا

فقام عم حوده كده يبص فيه إيه...
فلما قرب شويه شاف الست و قدر يعرفها علي الرغم من ملامحها المتغطيه بالتراب
و قالها: الست "الندابه" مالك يا خاله هو فيه إيه؟
بصت الست الندابه له شويه و قالت و صوتها رايح: انت يا بني مش عارف و لا إيه؟
فقالها عم حوده: عارف إيه؟
فقالت له الندابه: يا بني أهل البقر نشروا صور ساخره بيحاولو فيها الإساءة لحبيبي و حبيبك؟
فقالها عم حوده و هو غاضب بشده: حبيبي و حبيبك؟ مين ده؟ بتقصدي كابتن ميشو لاعب الكره الشهير؟

فبصت له الوليه و قامت حدفاه بحجر كان جنبها وقالت له:
لاعب كره إيه,يا عم حوده يا بتاع الثقافه و القرائه و الجغرافيا؟
فقالها و مازلت ملامحه غاضبه: أومال مين هو يا ست إنتي,ما تخلنيش أتجنن؟
فقالت له: هو مين المفروض يكون أحب إليك من نفسك ياعم حوده؟
فقالها: مش عارفها دي..اصل كل المقالات عماله تتكلم عن حاجات عبيطه و نظريات لعمك أرسطو
و أفكار الأسطي مش عارف مين اللي اكتشف نظريته وهو قاعد في الحمام....إنما ما حدش قالي
المفروض مين يبقي أحب إلي من نفسي؟

فقالت له: يا عم حوده إنت مش بتسمع كل يوم جمعه درس الإنشا,اللي بيطلعوا يسمعه معظم خطباء المساجد..إلا من رحم ربك منهم
فقالها:طبعا و الحمدلله...هم كل مره يدشوا الكلام و يقعدوا يقولوا "الصلاه و السلام عليك يا حبيبي يا رسول الله"
فقالت له الست الندابه: أيوه هو ده بقي...زي ما بيقولوا..يا حبيبي يا رسول الله...
رسول الله المفروض يكون احب إليك من نفسك يا عم حوده

فقالها عم حوده و هو بيتنحنح: معلهش يا ست ندابه, بس أنتي مش شايفه الكلام ده مش موضه اليومين دول
,و انا مهتم بالسياسه اللي فيها الكذب علي ودنه و كده يعني

ففجأه رجعت الروح لعمنا اللي كان عمال يبكي و اشترك في الحوار و قال:
يا عم حوده يا كينج يا كبير, مش موضه إيه بس؟ ده هو الدين دلوقتي اخر صيحه في كل حاجه
و كل من هب و دب بقي بيتكلم في الدين و ما عدش فيه حياء

و استرسل قائلا:
و بعدين انت ما بتشوفش الحريم في الشوارع و لا إيه يا عم حوده...
البنت تبقي لابسه من غير هدوم أصلا و حاطه برفان يطير العقل و حاطه حته خيشه علي راسها,
ما تعرفش علشان ما كنتش فاضيه تسرح النهاردة و لا إيه؟
أو حتي ممكن تنسي تلبسها...اصلها مش فارقه
و تكلمها تقولك,و الله مش عارفه الواحده مش مركزه في الصلاه ليه اليومين دول؟
و لا تيجي تقولها إنتي مسلمه التزمي بشرع الله...
تقولك إيه الرجعيه دي يا أهبل...إنت ما تعرفش إن الله جميل يحب الجمال
و إن الله ينظر لقلوبكم...
و قعد الرجل يفرقع صوابعه و يتمايل و يغني:"ياصلاه الزين يا صلاه الزين,علي
الدين الروش يا صلاه الزين"

و بعد الوصله اللي قدمها لنا أخونا المجهول ده,اكمل كلامه و قال:
و لا الشاب اللي تلاقيه واقف علي الناصيه و ساند علي العمود و ماسك سيجاره البانجو في إيده
و اول ما يسمع الأذان يستغفر ربنا و ينزل سيجاره البانجو لتحت شويه,علشان ما يصحش بردو..
و تقوله تعالي صلي..يقلك خمسه و أروح اصلي في البيت..
اصل انا ضارب شعري بمياه البطيخ و أخاف من مياه الوضوء عليه...
و كمان سالف الهدوم و أخاف عليها من المياه و السجاد اللي هو مش عجمي
و قام الرجل المجهول ده بوصله تانيه وقعد يغني و يقول:
"عجمي عليك يا ولد يا اللي فاتوك ال أحباب...و الحزن فيك اتولد و أنت لسه شباب"

و لا يكون الشباب حاطين شال الأخوه في فلسطين علي اكتافهم او في العربيه و يبقوا كده عملوا
اللي يقدروا عليه..و ساهموا في القضيه الفلسطينيه و تحرير المسجد الأقصي

و لا الواحد يسمعه له شريطين لأي شيخ أو داعيه...علشان ما يصحش يقف في وسط
زامايله ما يتكلمش بردو
و لا البنت تغطي راسها وقت الصلاه و بعد كده أحلي طناش؟

و طبعا مش هتكلم عن الناس اللي ما بتصليش أصلا..علشان تدول نجوم تتلألأ في عالم الخيبه...و ربنا يهدي الجميع
و تقف دلوقتي يا عم حوده مع أي كيس جوافه, يطلع يقولك قال الله و قال الرسول و يفتي للصبح
مع إني سمعت قول للأمام الشافعي قبل كده قال فيه:
"سؤل أمامي مالك في 48 مسأله, فقال في 32 منهم لا أعلم"
يعني تلتين اللي اتسأل فيه الأمام مالك (إمام دار الهجره و صاحب أحد المذاهب الأربعه) "قال لا أعلم"

و كأنه لم يسمع بحديث رسول الله صلي الله عليه و سلم "أجرئكم على الفتوي,اقربكم الى النار"

وقبل ما عم حوده يرد علي الرجل...تغيرت ملامحه و أنقطع نفسه و دفن راسه بين رجليه و رجع يبكي تاني

فسأل عم حوده الست الندابه: طيب و هم مين أهل البقر دول؟
فقالت له: الدانمارك يا خويا؟
فخبط عم حوده راسه و قال: يا خبر..دول بيعملوا نوع الجبنه اللي بحبه...و اللبن اللي الواد بيسه البرنس متربي عليه
لا حول و لا قوه إلا بالله...دا أنا كنت بحب البلد دي قوي ..
ده حتي كفايا إنهم ورونا احلي كره في كاس الأمم الأوروبيه 92
بعد ما شاركوا بدل يوغسلافيا..(أصل يوغسلافيا ما كنتش فاضيه و كانت بتموت لها شويه مسلمين في البوسنه و الهرسك)
و تنهد عم حوده و قال:
بس كانوا مفاجأه و قدروا ينسونا اخونا اللي بيتدبحوا في البوسنه..
زي بالظبط كده لما المنتخب الجميل بتاعنا فاز بالبطوله الأفريقيه و قدروا ينسونا
حادث العباره المصريه اللي غرقت في شبر ميه...اومال لو كانت بتعبر المحيط؟!!
عموما بعد الفوز الجميل و إهداء الكأس لأرواح الضحايا..مع إني مش فاهم ماذا يضير الشاه سلخها بعد ذبحها
بس أهو أي كلام و السلام و لا كأن فيه حاجه حصلت,و صلي صلي,و يا أم المطاهر رشي الملح سبع مرات

و يا سلام يا بيتر يا شمايكل و يا سلام يا مايكل لاو دروب أنت و أخوك بريان...احلي كره و الله يا ست ندابه

فقامت الست الندابه من قهرتها ماسكه حجر تاني و حدفت به عم حوده,
و قالت له: يا رجل عيب عليك؟ دول أعداء؟
فقالها:آه و الله فكرتيني...أنا اعتبرتهم أعداء بردو,من بعد ما خرجوا
نيجيريا من دور السته عشر في كأس العالم 98
و هابدوهوم 4 مقابل هدف واحد

فمسكت الست كمان حجر و هبدت عم حوده تاني, ففاق من الكلام الأهبل ده و قال لها:
طيب يا ست ندابه و هو المفروض نعمل إيه؟
فقالت له: مش عارفه يا خويا...انا عن نفسي بندب زي ما انت شايف و بحط التراب علي راسي..و كده يبقي قشطات

و فاق الرجل اللي عمال يبكي ده و قال: و أنا عن نفسي روحت شاركت في تصويت
كانوا عملينوا علي موقع أجنبي و كده كأني كأني جاهدت بالظبط و أي خدمه
و هوب غطس تاني براسه بين ركبتيه..
فقال لهم عم حوده: لا سيبوا الموضوع ده علي...انا هنظم مقاطعه زي اللي
عملناها مع الأموريكان,و قعدت لها يومين...بس انا من الأول ما بتطلتش ابيع السجايربتاعتهم
و كمان لما الكل بطل يبعها,و بقيت انا لوحدي كسبت كتير قوي...بتاع جنيه و ربع كده
انا قاطعت بس بيع السيارات الأموريكاني...

و كان عم حوده لسه راجع علي المحل بتاعه يشوف هيعمل إيه..فافتكر إنه كان عايز يسأل الست علي حاجه من الصبح
فلف و سألها: ألا قولي لي صحيح يا ست ندابه, هو مين الرجل اللي جانبك ده؟
فقالت له:
ده البوي فريند بتاعي...أصل إحنا شفنا إن الجواز مش حاجه موديرن دلوقتي..
فقلنا عادي نقضيها شباب في رحله و كده...و لا يكلف الله نفسا إلا وسعها يا عم حوده..
و إديتها ضحكه من إياهم و أحلي كلام يا عسل

فشاط عم حوده من الغضب و نط عليهم هم الأتنين و قعد يعض فيهم و يمرمطهم في التراب...
لحد ما قدرو يجروا منه

و قام عم حوده منتصر وقال: بس لازم نعمل حاجه...

و سخنت الفكره في راس عم حوده
وتخيل نفسه و هو قاعد امام المحل و كاتب علي اليافطه لا توجد منتجات دانماركيه
فتجسدت له روح الراحله "المقاطعه" للمنتجات الأموريكانيه و لعبت له في لامؤخذه مخيلته
و قالت له: يا عم حوده يا عبيط
هو انت اصلا عندك منتجات دانماركيه؟ و هي الناس لاقيه تاكل فول و طعميه لما تاكل جبنه من اوروبا
و الأهالي مش لاقيين يطعموا عيالهم و لا يجيبوا لهم هدمه يلبسوها علشان
يجيبوا لهم لبن من الدانمارك
و يا عم حوده يا عبيط يا اهبل...هي المقاطعه مع مين و لا مين؟ و اشمعنا
صحيح الدانمارك؟؟؟ ما النرويج و فرنسا و غيرهم و غيرهم نشروا الصور دي
و عندك الوزير الأهبل بتاع وزراه الإصلاح في إيطاليا...
قال إيه يا خويا,لابس لك تي شيرت علي الرسوم دي و فرحان قوي بنفسه بن العبيطه

و يقولو لك إيه يا عم حوده...حريه تعبير عن الرأي؟؟
يا أخي خالتك أنت و هو؟ (دي لبتوع أوروبا)و هو يعني حد كان يقدر يهوب و
يقول حاجه علي الساميه؟؟ (و ساميه دي تبقي خالتك يا عم حوده)
و لا علي المحرقه (اللي هي الفرن بتاع عم خميس الفران)
و ما فيش خمسه أختفت المقاطعه للمنتجات الأمريكيه و نسيها عم حوده,زي ما نسيها الناس

رأي الكاتب:
أنا طبعا مش رافض مبدء المقاطعه...بس انا شايف إننا لازم نعرف إن الهدف من
المقاطعه هو إننا نتوحد علي حاجه بقي
و نعرف مين هم أعدائنا...و نعرف دينا عايز إيه و نرجع له بقي...
فمش معني إنك بطلت تشتري حته جبنه يبقي خلاص كده عملت اللي عليك
و يومين و هتنسي أو تضعف و ترجع تشتري تاني
ياخونا حرام عليكم بقي
يا عالم...يا لهــــــــــــــــــوي
يا خونا حد يديني ربع جنيه...البنت واقفه مستنيه قدام السيما

يا اخونا مش مهم الواحد يكون بيغلط "فكل ابن أدم خطاء و خير الخطائين التوابين",و مش معني إن الأنسان بيغلط إنه يبطل
عباده, لا أبدا..و لكن المهم إنك تعرف إيه أخطائك و تنكرها بقلبك و تتضرع لربنا علشان يغفرها لك و يهديك للطريق القويم

يا اخونا ربنا قادر يخسف الأرض بمن عليها...و ينتصر لرسوله...و لكن هل نحن نستحق أن ينصرنا الله علي أعدائه و أعدائنا
بعد أن أصبحا أذل الأمم..و ليه؟ علشان حبينا الدنيا و استذلنا الشيطان ببعض ما كسبنا...كله بيجري ورا المال...
و انا عن نفسي قاعد في بلاد البترول..عمال أعبي أموال و دهب و ياقوت و هنود...أحمدك يا رب...
"المال و البنون زينة الحياة الدنيا و الباقيات الصالحات خير عند ربك ثوابا و خير أملا(46)" سوره الكهف

و نقول بقي شويه كلام محترم علشان اللي ما بيفهمش يفهم, و عسي الله أن يهدينا جميعا
قال تعالي في سوره التوبه:
"إِلاَّ تَنصُرُوهُ فَقَدْ نَصَرَهُ اللّهُ إِذْ أَخْرَجَهُ الَّذِينَ كَفَرُواْ ثَانِيَ اثْنَيْنِ إِذْ هُمَا فِي الْغَارِ إِذْ يَقُولُ لِصَاحِبِهِ لاَ تَحْزَنْ إِنَّ اللّهَ مَعَنَا فَأَنزَلَ اللّهُ سَكِينَتَهُ عَلَيْهِ
وَأَيَّدَهُ بِجُنُودٍ لَّمْ تَرَوْهَا وَجَعَلَ كَلِمَةَ الَّذِينَ كَفَرُواْ السُّفْلَى وَكَلِمَةُ اللّهِ هِيَ الْعُلْيَا وَاللّهُ عَزِيزٌ حَكِيمٌِ(40)"

سيدنا عمر بن الخطاب قالها حكمه :"نحن قوم أعزنا الله بالإسلام...فإذا أبتغينا العزه في غيره...أذلنا لله"

تنبيه هام....هذا المقال و جميع المقالات السابقه علي مسئوليه عم حوده الكينج و ليس
للكاتب أي دخل بما جاء فيها
و نشكركم لحسن المتابعه...
مع تحيات محلات عم حوده الكينج...ليس لنا أي فروع اخرى...
و يوجد لدينا حاليا...انفلونزا الطيور و إحذر التقليد عند الشراء :)

و أختم لكم بقي بالكام آيه اللي يشيبوا دول من سوره الكهف
قال تعالي:
"قُلْ هَلْ نُنَبِّئُكُمْ بِالْأَخْسَرِينَ أَعْمَالًاِ(103)الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًاِ(104)
أُولَئِكَ الَّذِينَ كَفَرُوا بِآيَاتِ رَبِّهِمْ وَلِقَائِهِ فَحَبِطَتْ أَعْمَالُهُمْ فَلَا نُقِيمُ لَهُمْ يَوْمَ الْقِيَامَةِ وَزْنًاِ(105)ذَلِكَ جَزَاؤُهُمْ جَهَنَّمُ بِمَا كَفَرُوا وَاتَّخَذُوا آيَاتِي وَرُسُلِي هُزُوًاِ(106)"

عم حوده الكينج و الأخر

If the words not displayed correctly, right click on the page, and from the menu, choose "Encoding" then change it to "Unicode(UTF-8)"

إقرا المقدمه علشان تتعرف بعم حوده...يالا الكينج مستنيك

السلام عليكم و عدنا من جديد
و أدي عم حوده الكينج الجميل...نازل من علي السلالم الشبه مش موجوده....في بيته القديم الشبه منهار
و الرطوبه الناشعه علي الحيطان...و منظر أخر رومانسيه
و بعدين خرج من الباب الضيق الللي يا دوبك خرجه للحاره الأجمل...
و هو بيكلم نفسه...ما هي الدنيا حلوه أهي, أومال الناس ما بقتش طايقه نفسها ليه؟

و تمعنا منه في الجمال قام عم حوده بالتأمل في أحوال الناس...
و كان معدي علي محل الست تقليه للكشري...فصبح علي صبيها عدس
و شاف بنتها القموره كوبشه و هي عماله تفعص في الطماطم و تغني..
و طبعا ريحه الكشري تهوس...دخلت في نخاشيش عم حوده الكينج...
و ريحه الصلصه اللي معموله من الطماطم المضروبه
فقال لنفسه و هو يملأ صدره بالريحه أم بلاش...

يا سلام علي ريحه الصلصه حاجه تجنن...الواحد المفروض يضرب له واحد كشري..فنادي علي الواد عدس
وقال: واحد كشري و كتر الدقه يا واد يا عدس.
عدس: أيوه يا عم حوده, أي خدمه...أنت تؤمر

و مافيش خمسه كان عم حوده راح علي المحل و فتح الباب و رش المياه...
و قعد علي الكرسي و جيه عليه الواد عدس و هو شايل طبق الكشري اللي بالصلصه المضروبه

و هو بيقول:أحلي كشري لأحلي كينج في المنطقه كلها...
فضحك عم حوده و قاله: مش هتبطل بكش بقي يا واد يا عدس...ألا صحيح قولي...لقيت الجبه اللي ضاعت و لا لسه
فضحك عدس و قاله: لا لسه يا عم حوده...أصلها وقعت في شارع ضلمه, فراحو يدوروا عليها في شارع منور شويتين
وضحك الأتنين و راح الواد عدس جري علي شغله...

و عم حوده بدء بقي يمزمز في الكشري السخن..و يدندن و يقول
يا حلاوه الكشري يا حلاوه...يا حلو لو يا حلاوه.

المهم فجأه الدنيا ضلمت و كأنها هتمطر...و سمع فجأه عم حوده صوت بيتكلم عربي مكسر(لامؤخذه خواجاتي)
و بيقول: إزيك يا عم هوده.
فبص عم حوده لفوق لفوق لفوق..أصله كان قدامه رجل فلق...عامل زي الحيطه..
لابس حته بدله عمر عم حوده ما شاف لها مثيل في الكساء الشعبي و لابس بورنيطه...
و نضاره كده زي بتوع الواد أبو عضلات ده بتاع فيلم الكوبوي تيرم نيتور...

فتخض عم حوده و رد بصوت متحشرج و قال: هوده؟ هو ده اللي بنا يا محترم؟
و شكله كان ناوي يستظرف كعادته و لكن لم نفسه لما حس إن عم الوحش ده ممكن ياكله

فسأل عم حوده هذا الوحش و قال: هو حضرتك مين إن شاء الله؟ و عرفت أسمي منين؟
فإبتسم الرجل إبتسامه صفراء و قال: هو فيه حد ما يعرفش عم هوده الكينج؟ كبير المنطقه؟

ففرد عم حوده قلوعه شويتين و شم نفسه و قال:أنا عارف يا أبني...بس أنا ماشفتكش هنا قبل كده و بعدين شكلك مش من المنطقه يعني؟
فقال الرجل: أنا فعلا مش من المنطقه أنا من عند حبايبك الأموريكان...بلاد الكوبوي.
فمصمص عم حوده شفايفه و قاله: أهلا بريحه الحبايب (وفي سره بيقول, هلو هلو..هو إنتم بدأتم توصلوا لهنا)..و الكريم أسمه يه؟
فقاله: أنا اسمي الأخر يا عم هوده؟
فقاله عم حوده: أخر؟ إزاي يعني؟
فقاله الأخر: إيه يا عم هوده هو أنت مش بتشوف وسائل الإعلام العربيه و لا إيه؟
فقاله عم حوده: معلهش يابني,أصل النضاره بتاعتي أتكسرت من مده و انت عارف بقي أنا رجل عضمه كبيره و السن له أحكامه.
فقاله الأخر باستهجان: يا عم هوده؟
فقاله عم حوده: أنا قريت مره مقاله كده لواحد من المطبلين بتوع الزفه اللي عندنا...
اللي هو رئيس تحرير مرتشي و عامل فيها وطني..(و هو وطني فعلا و الحدق يفهم)
المهم عم الوطني ده كان بيقول,إن لازم نحترم الأخر و نتفاهم مع الأخر و نبوس أيد الأخر و نشوف الأخر (شوفه علشان يشوفك)..
و حركات كده يعني...هو ده إنت يا بني؟

فأبتسم الأخر و قاله: أيوه يا عم حوده هو ده أنا,الأخر.

وفجأه سمع عم حوده صوت رفيع كده عامل زي صوت البرص...و بيقول إزيك يا عم حوده
فبص عم حوده لتحت كده عند رجلين الأخر, و لقاه ماسك واحد من قفاه و كان سحبه علي الأرض و مسففه التراب و كانت عنين الكائن ده مزرقه و حالته بالبلا

فسأل عم حوده الأخر و قاله: هو مين ده يا عم الأخر؟ هو ده ابنك و ضيع الجزمه بتاعته؟
و لا عيل بيلعب كوره في الحاره و كسر لك بترينه المحل بتاعك؟

فرد الأخر و قاله: لا يا عم هوده..ده الأخر بردو...بس الإرابيك فيرجن (النسخه العربي يعني)
فاستغرب عم حوده وقال: إزاي يعني..هو فيه كذا أخر و لا إيه؟
فقال الأخر اللي هو النسخه الكوبوي: طبعا يا عم هوده؟ دول الأواخر مقامات...فيه أخر أموريكاني و أخر صهيوني و أخر أوروبي و أخر ياباني
و أخر مالهوش لازمه (الأرابيك فيرجن), أند سو أون (وكده يعني بالبلدي)

فضرب عم حوده كف بكف و سأل الكائن المتبهدل ده وقاله: و إنت يا بني إيه اللي جابرك علي كده؟
فرد الأخر(النسخه العربيه): هو فيه إيه يا عم حوده..هو أنت مش عايش في الدنيا و لا إيه؟
لازم نحترم الأخر مهما عمل؟ و لازم نفهمه؟ و كمان لازم نعمله رز بلبن..أومال إيه؟ هو مش إكرام الضيف و لا ما عدش فيه مرؤه يا عم حوده...
و استطرد و هو لسه مبتسم و قال: و بذمتك يا عم حوده شوف الرجل ده قطع مسافه أد إيه علشان يوصل لحد هنا.

فكان عم حوده عايز يديلوا بالرجل في وشه و ضبه المفتوح ده و مبتسم و هو متمرط في الأرض...بس سبحان الله هيعمل إيه ما هو ما عدش فيه دم و لا نخوه عند الناس..

المهم سأل عم حوده الأخر الأموريكاني و قاله: طب و أنت عايز إيه مني يا عم الأخر؟
فسال لعاب الأخر الوحش و قال: كنت عايز حته حلاوه طحينيه يا عم هوده؟ و بعدين الواد الأخر العربي هو اللي هيدفع طبعا أو تشككها علي حسابه.
و نبقي نخلي صندوق الهدم الدولي, يجدول الديون اللي علي الأخر العربي ده فيما بعد لك يا عم حوده...و يمكن نبقي نضغط عليك و نخليك تخفض الديون أو تلغيها أصلا.
و يبقي علي رأي المثل يا عم هوده, ما الحلاوه ساحت و خلاص ما خلاص يا وله.

فطبعا عم حوده كش و دخل و جاب الحلاوه للأخر الكوبوي...
و شاف الأخر بيبعد لأخر الحاره و بيأكل الحلاوه بإيد
و في إيده التانيه مجرجر الأخر العربي (المبتسم و المتفائل دائما)علي الأرض و بيمسح به المنطقه كلها

و ما فيش خمسه و قعد عم حوده ياكل الكشري اللي برد...و لسه بيسمي و بيرفع الملعقه فلمح بطرف عنيه حاجه أخر دلع..
واحده ست إنما أخر جمال...و بتتمشي بدلع و جايه علي المحل بتاعه...فقام بسرعه وحط طبق الكشري بعيد و مسح فمه بسرعه في طرف البالطو..
و ظبط الطاقيه...أومال إيه...هو كل يوم بيشوف الكلام ده؟

فجت الست و قالت لعم حوده: إزيك يا عم خوده..؟
ما خدش عم حوده باله من لكنه الست أو ما فرقتش معاه و قال: خوده خوده...المهم أعيش, الجميل يؤمر بحاجه؟
فضحكت الست ضحكه أخر صهلله طيرت فيها برجين من عقل عم حوده و قالت: أيوه يا خوده يا خبيبي...هو الواد الأخر الأموريكاني ما عداش من هنا؟
فاستغرب عم حوده و قال: و إنتي إيه علاقتك بقي به إن شاء الله؟
فغمزت له و قالت: ما هو أنا أم الأخر الكوبوي يا عم خوده؟
فاستغرب عم حوده: أم الأخر و اللي جابوه كلهم كمان يا عسل
وسألها: و اسم الجميل إيه؟
فردت عليه بدلال و قالت: فيدرا؟
فأندهش و قال: زوجه الخواجه كوهين الحرامي لعنه الله عليه و علي والديه (راجع حدوته عم حوده و الدستور يا سياد)
فأبتسمت و قالت: أيوه أنا أم الأخر الأموريكاني..تربيه إيدي و بمشيه زي ما أنا عايزه و ما يعصاش لي أمر, و ألا قطعت عنه المصروف

و خمسه كده و جات واحده تخينه و متبهدله يا عيني و سألت عم حوده: ايوه يا عم حوده, ما شفتش الواد أبني الأخر العربي؟
فضحك و قال: أه شفته,الحقي بقي الواد الأخر الاموريكاني مبهدله علي ناصيه الشارع و رابطه في عمود النور و بيفرج عليه خلق الله...
و أبنك عمال يضحك زي الأهبل مش عارف ليه..

فحدث التقاء لنظارات الحاجه أم الأخر العربي...و الست فيدرا أم الأخر الكوبوي...
و قبل ما تنطق أم الأخر العربي,كملت اللمه بقي,بقدوم الست بهانه كوين اللي كانت جايه تاخود حته صابون علشان تحمي الواد بيسه البرنس بن العم حوده

و فجأه و بدون سابق إنذار...قالت الست بهانه كوين بصوت أسد كاسر: فيدار مرات الخواجه كوهين الحرامي لعنه الله عليه و علي والديه؟
فأرتجفت الست فيدرا...فهي علي درايه كامله مين هي الست بهانه كوين فتوه المنطقه و اللي صدت العدوان الثلاثي في الحاره من كل من(فيدرا و ماريكا و راشيل)
و فجأه هجمت الست بهانه كوين علي فيدرا و مسكتها من شعرها و جرجرتها علي الأرض

و قعدت تقول: من ده بكرا بقرشين(أصلها كانت هتتدبحها بمناسبه العيد)
و عم حوده كان فخور بمراته و حس إن فلوسه حلال...مش بيعلف علي الفاضي...

فسألت الست أم الأخر العربي : هو فيه إيه يا خويا...هي الست دي بتضرب الست الغلبانه دي ليه, دي شكلها بنت ناس حتي؟
فقالها عم حوده: بنت ناس؟ ده أنتي طيبه قوي؟ دي أم الأخر اللي مبهدل أبنك و عمله زي الشوخ شيخه

فغضبت الست أم الأخر العربي,و هاجت و ماجت و جريت علي الست 'فيدرا'هي كمان و مسكتها من شواشيها (أم شعرها يعني)
و قعد عم حوده مبتسم ياكل طبق الكشري اللي برد قوي...

و الأخر الأموريكاني ماسك الأخر العربي مطلع عين أهله
(بس علي مين,الأخر العربي ماسك نفسه و مبتسم و لا كأنه فيه حاجه, اومال إيه..ماهو لازم يحترم الأخر)

و الحريم ماسكين في الست فيدرا و مقطعين لها شعرها اللي مكلفها تمن كام بير بترول من بتوع العراق

و شكلها كده يا ولاد, ما عدش بيدافع عنها غير حريمها...أو رجالها بقوا زي حريمها إلا من رحم ربك, ما تعرفش...

و إن شاء الله تعمريها و عيالك يجروا فيها

و نراكم قريبا في حدوته أخري من حودايت عم حوده الكينج

عم حوده الكينج و عصابه الشباب الأرعم

If the words not displayed correctly, right click on the page, and from the menu, choose "Encoding" then change it to "Unicode(UTF-8)"

إقرا المقدمه علشان تتعرف بعم حوده...يالا الكينج مستنيك

السلام عليكم و عدنا بعد ما ربك ستر و نفدنا من الحبس :)
و بعد حكايتنا السابقه عن الشقيق العربي و السباق العجيب مع الشباب الأرعم
هاجر الشباب الأرعم لإحدي دول البترول...علشان يعيشوا و يأرعموا بقي زي ما هم عايزين
بس علي مين...هي فيه زيك يا مصر يا غاليه...دي حتي مصر أم الدنيا و اللي فيها
و للآسف قصتنا اليوم هي من النوع بتاع حدث لامؤخذه بالفعل
يالا بينا نبتدي....

أدي عم حوده كعادته قاعد و بيهش الدبان من علي وشه...و شويه يعدل الطاقيه الصوف اللي لابسها في عز الحر..المهم قاعد لا به و لا عليه...
و علي فجأه كالعاده جيه صوت الواد عضمه صبي المعلم عكوه الجزار: إلحق يا عم حوده؟
عم حوده: يا حفيظ يا رب, إنت تاني يا عضمه؟ يا بني مش كده أنا رجل كبير و مش حمل خضه.
عضمه: معلهش يا عم حوده. أصل الموضوع مهم قوي.
عم حوده: خير يا سيدي؟
عضمه: إبسط يا عم حوده قبضوا علي الشباب الأرعم, اللي إنت قلت لي عليهم في الحكايه بتاعت السبق؟
عم حوده: أولا اسمها أرعن يا عضمه, إفهم بقي؟ و بعدين أنا أكيد كنت هعرف يعني...
بس إنت سمعت الكلام ده فين؟
(و الخبر طبعا جديد علي عم حوده, أصل عم حوده ما بيقراش غير الجرايد القديمه, و الخبر ده لسه طازه و بنار الفرن يا أخبار...)

عضمه: يا عم حوده. أنا شفتها بعنيه دول علي التفلسيون.

عم حوده: الله أكبر, قولي إزاي يا واد يا عضمه و فين قفاشوهوم ولاد الإيه دول؟

عضمه: أنا حافظ اللي المذيع قاله بالظبط يا عم حوده...و كرر عضمه النشره بشكل غريب...طبعا هو كل يوم بيشوف شباب أرعم؟؟

المذيع قال:
تم القبض علي عصابه الشباب الأرعم المتهورين...و هم حسب ظهور الصور كالتالي:-

ميكو العجيب: زعيم العصابه و الممول الأول و الوحيد للسيارات المستخدمه في عمليات الأرعمه
(مكتوب تحت الصوره "تعلن محلات ميكو عن تأجير جميع أنواع السيارات عاده و أوتوماتيك...بمجفف و بدون")
إيكو الزئبقي: نقطه الضعف في العصابه و اللي وداهم في داهيه...
(مكتوب تحت الصوره, "طول ما فيه طيبين هكبر و أترعرع علي مص دمائهم"
"و لبس صاحبك و طير له رخصته, أهو بكره يتنصح ويفوق لعملته")

دندن المسكين: ضحيه كل عمليات العصابه...
(مكتوب تحت الصوره, "يا ما في الحبس دنادين",
"و إبعد عن المبتدئ و غني له, و لو ما أخدش الرخصه المره اللي جايه إبقي إدعي له")

عضمه: و كمل المذيع قصه القبض علي العصابه بقي يا عم حوده و قال.

المذيع: و بدء إيكو المسجل خطر التخطيط للعمليه بإختيار الضحيه...
ووقع الإختيار علي حلم صديق هندي مسكين, كان يستأجر سياره ليخرج و يتفسح مع أهله الهنود الغلابه, و لكن الذئب البشري سعي لتدمير سعاده هذا الصديق و اللي إسمه "مافي مفهوم"

و طبعا قام بوضع الخطه بدون علم المعلم ميكو...و قال لدندن الغلبان...
"خلينا نكبر بقي, فلن أعيش في جلباب ميكو"

و حيث أن دندن لم يشاء أن يترك هذا الشاب الأرعم الناشئ يدمر كل شئ و خاف عليه من غضب الرايس ميكو...و اللي كان بيخطط لمستقبل إيكو, و كان عايز يجوزه بنته الفاتنه الجمال...
التي يتصارع علي قلبها الكثير من الشبان...و منهم كاتب الحواديت نفسه..
خصوصا بعد ما أتعلمت تضحك و تقهقه و ربنا يبارك....
لكن إيكو أراد أن يعض الإيد اللي إتمدت له بمعلقه الشوربه السخنه...و لمته من برد الشتاء...تيرا تيرا, تيرا را...(موسيقي حنينه و الدمعه تفر من عين إيكو)

و قام إيكو الزئبقي بفعل غريب في عالم القياده الأرعميه, حيث جعل السياره في وضع غريب جدا, بحيث أدهش الجميع, و أخذوا يتسائلون, هو عملها إزاي دي؟

هذا و قد تم القبض علي العصابه متلبسه, بعد أن قام السيد إيكو الزئبقي بنهش الحلم الجميل للصديق الهندي و ركل سيارت الهندي بلامؤاخذه مؤخره سيارته, ثم هرب من أرض المعركه...
و قام الصديق الهندي بإبلاغ الشرطه...
و ترك إيكو, دندن المسكين صامدا كالبطل الصنديد في أرض المعركه, محاولا أن ينقذ ما يمكن إنقاذه.
و الإتفاق مع الصديق "مافي مفهوم" من منطلق "يا دار ما دخلك شر, و إيكو خلاص هرب فخلينا نوصل المركب للبر"

و قام السيد دندن بالإتصال بالراس الكبيره, علشان يستسمحه و يجي بردوا يصلح غلطه زميلهم الأرعم و أهو ضل ميكو و لا ضل حيطه...و يزودوا الإحتياطات الأمنيه و يعملوا غطاء جوي مكسف علي المنطقه لتضليل العداله.

و جاء المعلم ميكو العجيب, بسيارته الصاروخيه الغاليه قوي قوي. (علي قلوب حبايبه و بس)
و شويه حركات و كل شئ ماشي في السليم و الخطه محكمه...
وجاءت الشرطه و دندن يكمل التمثيليه بذكائه و صموده كبطل...

و علق المذيع و هو بيطلع لسانه: "و لكن ما فيش جريمه كامله يا اسطاوات"

و في حين كان الحاج ميكو مشغول جدا بمحاوله حل اللغز العجيب اللي كان عمله السيد إيكو بالسياره,"معضله و لا بتوع أرش(لامؤخذه)ميدس"
و لكن فعلها ميكو كبطل في سباقات "الفول ميوكا وان, علي اسمه (ميكو)"

فقد ظهر في الصوره فارس من الأفلام الهنديه المحبوبه لدي البسطاء, و قالها بأعلي صوته:
"ناهي, ناهي" (لا لا يعني)...هذا صديق طويل ما كان يسوق سياره, هذا صديق مال هو يهرب و يترك سياره. مهراجا مهراجا
(شخص رخم رخم بصراحه يعني, بس هو ممكن كان فاكر إنه بقوم بالواجب مع أبو دندن...فنشن الفالح و نشانه صاب)

و تغير الموقف, و إنقلب السحر علي الساحر. و إحمر وجه ضابط الشرطه و طالب بحضور المجرم الهارب و إلا سيتم تقليع السيد دندن و وضعه علي حمار و وشه للذيل...

فتشاور دندن مع الراس الكبيره (بروس ميكو)...و طبعا إعترف دندن بكل رجوله و أسرع من البرق علي صاحبه و حبيبه...(أصل دندن بصراحه ما بيحبش الحمير, و لو مفروشه حرير و هييييه)

المهم تم استدعاء المجرم و قامت الشرطه بوضعه في مكانه المناسب في سياره الشرطه...
إعدادا لوضعه خلف القضبان...
و ذهب بقيه أفراد العصابه إلي قسم الشرطه للإعتراف علي زميلهم
ليتم تطهيره من خطاياه السابقه (زي الإشاره اللي كسرها قبل كده)
و طالب السيد ميكو بترويق الزميل إيكو و الضغط عليه ليعترف (رجل رجل حقيقي)

و لكن بدهائه المعتاد كذئبقي إتمسكن لحد ما إتمكن, و لولا ستر ربنا,
ثم طيبه قلب الشرطي و دعاء الوالدين...
و مساعده الرجل الهندي الصديق "مافي مفهوم" اللي قعد يتحايل علي رجال الشرطه
علشان يسيبوا إيكو
(و لم تتضح بعد العلاقه بينهم, بس شكل إيكو كده, كان بياكل مانجا هندي كتير, أو كان بيتدرب علي ركوب الأفيال)

و خرج منها إيكو زي الشعره من العجين..و لحوس رخصه أخوه دندن في الطين...
حيث تم ترك المجرم عتيد الإجرام يرحل و تم تدبيس المسكين دندن...اللي لسه واخد الرخصه من أقل من شهر...(ولسه الفلوس اللي صرفها عليها مابردتش)
فجعلوا دندن مجرما...(و شويه موسيقي مؤثره لبرنامج ماوراء الأسوار)
و تتر مسلسل ذئاب الجبل
"و لابد من يوم معلوم تترد فيه المظالم...أبيض علي كل دندن, بمبه علي كل إيكو"

و أعلن المذيع تحذير هام للجماهير: تنبيه هام لكل الساده قائدي السيارات...
اللي يشوف إيكو, يهرب و يروح علي بيتو...العمر مش بعزقه يا أخونا...فالإيكاويون قادمون

كما ترفع الجماهير الأيدي بالدراعه لكي تعود رخصه دندن إليه بسلام
أصل هم بصراحه مطلعين عينه, و من هنا لهنا و حاجه تقرف....و كلنا معك يا دندن...

و طبعا الكل بيسأل مين البطل الأسطوري اللي فيش العمليه كلها؟؟
بصراحه ماحدش يعرفه..حتي الصديق الهندي "مافي مفهوم"...
ظهر و ضرب ضربته ثم إختفي...فإستحق بجداره لقب "الهندي مبيد الأراعيم"

عم حوده: يا سلام يا واد عضمه. شفت بقي مافيش جريمه كامله. و المجرم لازم يتجاب.أومال إيه.
و الهدف ياواد يا عضمه الجريمه لا تفيد...حتي لو كانت العربيه معموله من الحديد

و كل حادثه و إنت طيب يا إيكو يا طيب
يا للي بهدلت رخصه دندن في الأمد القريب, يا
يا إيكو يا طيب...

و طبعا نختم بجملتي الشهيره له...
"يا واد يا إيكو....إنت يا واد, إنت لسه ماروحتش تجيب العيش من الفرن يا واد؟؟؟"

عم حودة الكنيج و الأهلي و الزمالك

If the words not displayed correctly, right click on the page, and from the menu, choose "Encoding" then change it to "Unicode(UTF-8)"

إقرا المقدمه علشان تتعرف بعم حوده...يالا الكينج مستنيك

يا فتاح يا عليم يا رزاق يا كريم...ده طبعا عم حوده الكينج
و هو بيروش شويه مايه أمام المحل بتاعه...و الناس رايحه جايه و بيصبحوا علي عم حوده
لحد ما جيه صوت رفيع و بيتكلم بسرعه و يقول: صباح الخير يا عم حوده يا كينج...هو إنت فتحت النهاردة ليه؟
فرد عم حوده بتسائل: ليه خير إن شاء الله؟ هو النهاردة 6 أكتوبر و لا 23 يوليو و لا العيد القومي للحلاقين؟
فرد زقزوق أفندي فذلكه: لا ده و لا ده, ده اليوم المنتظر, يوم الكرامه و الثأر, يوم الرفعه و الشهامه...يوم تعويض ما فات..يوم العزه...و و
عم حوده بزهق: مبدئيا عزه دي تبقي خالتك..إنت عايز إيه يا عم زقزوق أفندي ما تطلع من دماغي؟
فضحك أبو الزقازيق و قال: حلوه منك يا عم حوده...بس النهادره اليوم اللي هو...
عم حوده: أوووووف...يا ستار يا رب...يوم إيه يا سيدي؟
فرد عم حقاني الشديد اللي كان جاي علي المحل: يوم الخيبه يا سيدي.
عم حوده جري علي إيد عم حقاني و باسها, تعالي يا عمنا,أقعد يا بركه.
فقعد عم حقاني و بص لزقزوق من تحت لفوق و قاله:
مش عيب عليك, تبقي زي الشحط كده و لابس شورت و فانله و بتمدغ لبانه؟
يا أهبل,إخص عليك رجل خسع...
وبعدين وجه الكلام لعم حوده:
يا عم بيكلمك الكائن ده عن ماتش الأهلي و الزمالك يا سيدي.
قال يعني إحنا خلصنا كل حاجه في الدنيا و فاضيين للماتش ده؟
فقال عم حوده: لا ما يصحش خالص؟ هو الماتش إمتي يا واد يا زقزوق أفندي؟
و لسه عم حقاني هيتلكم...فجأه جات كوره في باب المحل...و هيصه و زومباليطه, و أهلي أهلي..أهلي,أهلي,أهلي,أهلي,أهلي...و مره واحده بس زمالك...

و تحولت الحاره لفرح كبير...و الستات طلعت تزرغد من الشبابيك...
حتي فيه ست كانت بتسأل جارتها هو فيه إيه يا ختي؟
فردت جارتها: مش عارفه؟ اللي بيكتب المقاله ده باين عليه رايق...
مخليني أسيب الطبيخ و الغسيل و أبو العيال اللي بليفه من الجلخ اللي عليه,
علشان نطلع نزرغد, و الله روقان...
فردت عليها جارتها:زرغدي يا ختي زرغدي أهو أحسن ما يرمينا من القصه...
أهو بكره يطلع لك جوزك الجربان ده نجم مشهور في سماء الكوره البطيخيه...
المهم لسه عم حقاني هيتكلم...فلاقي عم حوده الكينج واخد ديل جلابيته في سنانه و بيجري مع الناس..و بيقلع الجلابيه...فظهر من تحتها شورت أبيض و فانله حمراء...فضرب عم حقاني كف بكف ومشي...
فقام عم حوده قابل الواد عضمه صبي المعلم عكوه الجزار...وقاله: يا واد يا عضمه هو الماشت متزاع و لا اوكسيك لوسيف علي إي فار تي؟
عضمه:لا يا عم حوده الباشا الكبير الكبير بتاع ال إي فار شي..
واخد البطوله دي اوخسيف لوسيف... بس تعالي معايا..
الواد "زوقلت دلعوني" صبي المعلم"عبدو مزاج" جابوا إي فار تي...في القهوه عندهم...و كمان إيه مشروب مجاني...بس المنيمام تشارش 2 جنيه و نص...
عم حوده: بوف...كتير قوي...بس نعمل إيه بقي كله علشان عيونك يا أهلي...عموما أخود من فلوس الداوا بتاع الجماعه حرمنا الست بهانه كوين...أهو نشوف الماتش و يمكن علي أما أرجع تكون الروح طلعت للي خلقها
و جري الإتنين علي الماتش....
زحام شديد و اللون الأحمر مغطي المكان...و هتافات من النوع التقيل من جماهير الأهلي...

و البت بيضا, بيضا بيضا و البت بيضا و أنا اعمل إيه
و الشياطين الحمر...اهوم اهوم اهوم
و إلعب يا أهلي...و
و جاء صوت المذيع كأنه بيذيع فرح جوز أخته...
أهلا و سهلا بكم و كل عام وأنتم بخير...
مش عارفين نبتدي منين بصراحه, بس أنا شايف إن جماهير الأهلي في كل مكان مغطيه الاستاد
و مش شايفين جماهير الزمالك تقريبا كالعاده...
و أدي جماهير الأهلي بيسمعوا جماهير الزمالك الأغنيه الشهيره....
البت بيضا , بيضا بيضا....البت بيضا و أنا أعمل إيه؟؟؟
ضيعت مالي علي حلالي....ضيعت مالي يا جوزيه ليه؟؟؟
ضيعت مالي يا برتغالي...و أنا اشتريت لاعب برتغالي ليه؟

و يبدو أن جماهير الزمالك لم تفق من الصدمه بعد...
حيث الماتش الأول انتهي لصالح الأهلي بهدفين مقابل صدفه واحده للزمالك
حيث أن النادي الجريح جاء إلي الأهلي الأسد الكاسر و شكلهم خايفين لياخدوا السته أوالأربعه...

فعلق زقزوق أفندي فذلكه اللي كان سبقهم علي القهوه:
و قال إيه يا خويا يقولك الزمالك أحق إنه يكون فريق القرن في أفريقيا؟
هو ممكن يكون فعلا فريق القرن الأفريقي لو بيقصدو الصومال
واللي المجاعات فيها علي ودنه...و يبدو إن الزمالك سيشهد السبع العجاف تاني يا خونا؟؟؟

و كمل و قال: و المعروف إن الزمالك في اللغه التركيه معناها أرض العشش...
و بعدين بقي بنوا فيها شويه عمارات و لما عم حوده الكينج أعلن بس إنه هيفتح هناك محل, فقام سعر المتر ولع و بقت بقدره قادر منطقه راقيه..
فهتف عضمه هتاف اشهر من هتافات جماهير الأهلي و الزمالك
"و سعر المتر ولع ليه, حوده الكينج شاور عليه"
المهم إبتدي الماتش...
و شويه كور ضايعه و شويه لعب من الفريقين كالعاده...
لحد ما طبعا الزمالك يسلم لحبيبه التقليدي النادي الأهلي...
بمجرد أن يسمع نداء الجماهير البت بيضا بيضا بيضا...و كأنها كلمه السر...
و هوب...بركات و الجون الأول....و تهليل و هيصه و لا كأننا حررنا القدس....

بس عم حوده لمح حاجه فسأل: هو الزمالك لابس شورت إسود ليه يا ولاد؟
فسمع بقي أحلي تعليقات:
عضمه: حداد أرض أرض يا عم حوده...
فذلكه: لا لا...حداد سفلي يا كينج...
انونيماس بيرسون (شخص مجهول يعني): بدل ما الوساخه تبان من كتر الزحلقه علي الأرض..
و هوب بركات و الجون التاني...و هيصه و أي كلام..
عم حوده إيه ده يا ولاد: هو مش ده الجون الأول بيتعاد؟؟؟
عضمه: لا لا يا عم حوده..
إنت مش شايف اللاعب الغلبان اللي بيتزحلق ده واللي مش عارفين هيغسل هدومه إزاي
قبل ما يروح و ياخود الطريحه التمام من الجماعه في البيت علي توسيخ هدوموه...
و شويه دلع للبت البيضا و صفاره الحكم...و نهايه الماتش
عم حوده: إيه القرف ده..هو يعني لازم نديهم شويه لاعيبه من عندنا علشان يعرفوا يلاعبونا؟ إيه ده..طب لما هم مش أدنا...إيه اللي جابهم عندنا؟ مش كانوا يوفروا تمن المسحوق اللي هيغسلوا به الهدوم....
فذلكه: يا عم حوده أهو إنت بردوا هينوبك من الحب جانب..و أهو تورد مسحوق للنادي الغلبان ده و ينوبك ثواب بردوا...
و هتف عضمه و الناس اللي في القهوه وراه: "و المسحوق بيخلص ليه, طلب البيضا زاد عليه"

و إقترح عم حوده الكينج إن الزمالك يغير لون الفانله, للون أغمق شويه علشان البقع ما تظهرش

كما تنصح محلات عم حوده الكينج بعدم استخدام الأصناف من النوع أبوتريكه يا مجرم و بركات يا لعيب عند إرتداء الطقم الأبيض...
و طبعا ده بعد ما الأهلي رفع النوع الرائع "بيبو و بشير, بيبو و الجون" من الملاعب
علشان الطقم الأبيض اتبهدل و بدء ينسل و يدوب من كتر الغسيل

و البت بيضا بيضا بيضا...و البيت بيضا و الأهلي يعمل لها إيه؟؟؟
و كل هزيمه و إنتم طايبين...
و اللي وصل لهنا نقوله لا للتعصب يا جماعه,حقيقي لا لا لا...
حيث أن الأهلي و الزمالك هم قطبي الكوره المصريه, بس الزمالك مش مشحون كويس اليومين دول...
و بعدين هنلاقي منين فريق طيب زي ده...ياخود سته ما يضرش...ياخود أربعه ما فيش مانع...ياخود رايح جاي...و إيه يعني...
نصيفه من الدوري,كاس أو بطولات قاريه..ما في مشكل صديق
و بكده يا أخونا خلصت الحدوته و أثبتت التجربه العمليه إن
أكيد الزمالك هو القطب السالب في الكره المصريه

"و القطب السالب ولع ليه...فولت الأهلي عالي عليه"
"و القطب السالب يا حلاوه...و البيت بيضا و أنا أعمل إيه؟"

عم حوده الكينج و الداستور يا سياد

If the words not displayed correctly, right click on the page, and from the menu, choose "Encoding" then change it to "Unicode(UTF-8)"

إقرا المقدمه علشان تتعرف بعم حوده...يالا الكينج مستنيك

السلام عليكم. عدنا إليكم من جديد
وحكايه جديد من عالمنا الكوميدي....نآسف عالمنا العربي

أهلا بكم من تاني مع عم حوده الكينج...و لا لا, سلام قول من رب رحيم...سلام قول من رب رحيم ..يا حفيظ يا رب...
ده كان صوت عم حوده و هو صاحي مفزوع في سريره.
ففزعت الست بهانه كوين مراته و قالت: خير يا سى حوده مالك يا خويا, خير اللهم إجعله خير
و جابت كوب ماء لعم حوده المخضوض..و اللي لونه مخطوف...لحد ما بعد شويه هدى و بدء يتكلم
و قال:إسكتي يا بهانه يا كوين يا ختي...كابوس, قال إيه خير اللهم إجعله خير.
شفت الأسياد قاعدين في مجلس كبير و قال إيه يا ختي بيجهزوا للداستور,علشان ما حدش يحاول يصرفهم بعد كده...
الست بهانه كوين: يا ستار يا رب, داستور إيه يا عم حوده, إحنا كل اللي نعرف نقوله للأسياد , نقرا آيه الكرسي و نقول بعدها إنصرف, إنصرف, لا تإذيني و لا أذيك.
لا يا بهانه: مش دول الأسياد بتوع الجن, دول غلابه.
إحنا دلوقتي أمام الأسياد بتوع الإنس. اللي بيهلو علينا من بلاد الكاو بوي.

و قال إيه يا ختي, عايزين يعملو لنا دوله ذات ديمقراطيه صغيره في المنطقه.
علشان تكبر و تبلع كل المنطقه.
و تضرب لها بعد كده كام مليار برميل بترول علشان تعرف تهضم المنطقه كلها, و تتجشأ شويه غاز طبيعي ما يضرش بردوا صحتين يا حبي..

و الناس في بلاد ما وراء الوافدين...اللي هم, فرع حجله (دي لعبه ظريفه) وفرع الكورات (و ده نوع لذيذ من الخضار)....(وطبعا معروف مين الوافدين, و لا الكام الف عسكري دول ضيوف و هيمشوا كمان 200 أو 300 سنه)

قال إيه طلعوا للتصديق علي الداستور,و قال إيه هيحقق لهم لامؤاخذه الرخاء...(بتشديد الخاء)

ده ياستي بعد ما مجلس الأسياد بعته بالفاكس من عند تمثال الست اللي ماسكه كشاف الحريه علشان تنور المنطقه بالديمقراطيه...و هي علي فكره كانت مخطوبه زمان للرجل اللي كان بينور الفوانيس في شوراع مصر أيام الإحتلال الإنجليزي و اللي كان اسمه عفريت الليل...

فقالت له الست بهانه و هي بتمصمص شفايفها: يعني إيه يصدقوا يا خويا. هو كان بيكذب عليهم؟ و هم ليه يصدقوا حد ما يعرفهوش؟

فضحك عم حوده الكينج وقالها: يا هبله...الداستور ده مش شخص...ده غول من بتوع زمان..أيام اللورد ترومر و قريه فنشواي
بس المره دي من عند المعلمين بتوع الهنود البنفسجي...(أصل اللون الأحمر ما عدش موضه دلوقتي)
و هيقسموا بلاد الوافدين بقي إلي دويلات لامؤخذه فيدراليه...

إيه إيه إيه؟ فيدرا إيه؟ ..
استهجنت الخاله بهانه: هي الوليه فيدرا دي راحت هناك؟
انا فاكراها..مش دي زوجه الخواجه كوهين الحرامي؟ لعنه الله عليه و علي والديه؟

فرد عم حوده: يا وليه إهمدي بقي الناس مش عارفه تقرا المقاله, أنا عارف إيه اللي خلاني أكتب المقاله و أصحي و الاقي نفسي جانبك..و الله الواحد له الجنه..خليني أوصل الفكره للجماهير...أصل ده بردو حق لامؤاخذه الجمهور..

و بمناسبه الجمهور فكرتيني يا بهانه بالمخالفه اللي أخدتها ب 500 جنيه...مش عارف أخدتها ليه أصلا. قال إيه ياختي. قياده العجله أم صندوق بتاعتي اللي بجيب بها البضاعه للمحل بتهور و تهديد حياه الجمهور

جمهور إيه مش فاهم؟ هو أنا كنت بسوق في استاد القاهره.
و استرسل عم حوده و قال: المهم يا ختي خير اللهم إجعله خير.

شوفتهم عاملين لجنه في السجن اللي كانوا بيعذبوا و يغتصبوا فيه الرجاله..
و ضربت الفكره في دماغ عم حوده...يا سلام يا أبو حوده يا كينج لو كنت في السجن ده وقت القلع..و تهيص مع الحريم الأموريكاني..
ولسه سرحان شويه...فغزته الست بهانه بكوعها. وقالت: عارفاك و عارفه بتفكر في إيه؟ بس الخوف يا كينج يطلع حظك دكر؟!!! و ضحكت بتهكم
فغضب عم حوده الكينج وقال: استغفر الله, إيه ده يا شيخه؟ عيب عليكي؟
المهم خلينا نكمل الحكايه الناس زهقت.

المهم يا ستي الرجاله بقي كانوا عاملين حاجه غريبه قوي؟
كانوا قالعين الجواكت و رابطنها من عند وسطهم و إنت نازل؟ شكلهم كانوا بيأمنوا؟
ما هو علي رأي المثل اللي قلع في الغرفه,لبس الجاكت علي وسطه وعجبي؟

فسألت الست بهانه كوين سؤال: و يعني إيه داستور يا خويا؟
فقال لها عم حوده: ما بلاش؟ أصلها غالبا كلمه فارسيه معناها "قاعده" يتم علي أساسها وضع بقيه قوانين الدوله؟
و إنتي بقي عارفه كلمه قاعده دي بقت بتجيب حساسيه للأسطي دورد بوذ...

و الداستور ده بقي فيه شويه حاجات حلوه قوي خودي عندك

حيث لازم و لا بد إن يكون ربع كراسي الأعده بتاعت المجلس من الحريم
أومال إيه؟ مش لازم نطري الأعده برضوا..و أهو يبقي التصقيف و موافقه و تقليل الصنف الخشن
حقيقي غربيه شويتين؟ أومال فين الديمقراطيه؟ اللي بتقول مافيش حاجه إسمها نسبه ثابته لفئه معينه من المجتمع؟
بس إنت عارفه يا بهانه...دي مصلحه للبت أختك اللي عايشه مع جوزها الأسطي حوكشه...و اللي شغال عميل للقوات الأموريكانيه..يعني تطلب الجنسيه و ترشح نفسها و تسرق لها كام برميل بترول و تعدي الفقر بقي...

و هيبقي فيه قانون فيدرالي بحيث أن يتم تغليب (من الغلب يعني) قانون الإقليم علي قانون الدوله الفيدرالي عندما يتضارب الإتنين
الست كوين: يعني إيه يتضاربوا بقي؟ زي العركه بين حسنين و محمدين؟

فتجاهلها عم حوده و كمل:و ما تمش تحديد مين بقي اللي هيتحكم في البترول؟ الأقليم و لا الحكومه الامؤاخذه الفيدراليه
و طبعا السبب معروف؟ لأن ما فيش بترول لحد في البلد دي؟ أومال الأسطي دورد بوذ ياكل منين؟
و كمان بقي لم يتم تحديد الهويه العربيه للدوله..انا صراحه شايف إن ده شئ حلو للي عايز يفلسع من هناك و ياخود تأشيره علي الدول المتأدمه..فكريني أبقي اقول للواد عضمه

و كمان يا ستي اتكرموا علينا و لله الحمد إنهم بقي هيخلوا الأسلام هو الدين الرسمي للدوله,
و الله يشكروا و عداهم العيب و لامؤاخذه أزح...
أكراد و سنه و شيعه؟ و الله دي فضيحه
أومال فين حق كوهين و ولاد اخته في البلد؟ هم مش جوز خالتهم بردو ضرب حجرين قبل كده علي قهوه بلدي علي شط حجله؟
و ذاع (مش زاغ) بصر عم حوده كإنه لبسه الأسياد فسألت الست بهانه: خير يا عم حوده مالك...
فلقيته بيتكلم بصوت مش صوته (صوت ال سي إن لامؤخذه كمان إن)
و يقول: أنا سامع الجماهير دلوقتي بتتلف حول الكليه العربيه...
أو معهد عبدو باشا للدول العربيه...حيث أنها لم تحصل جامعه أصلا
وهتاف الجماهير يتصاعد...قاعدين ليه ما تقوموا تروحوا...

و يا مسهل...
أهو بكره نعيد نفس المقاله بس عن ديمقراطيات صغيره جديده أخري في بلادنا الجميله
بس طبعا عندنا في مصر بقي مثلا...هيبقي التقسيم عسل..
أهل المدن, صعايده و النجوم الكبار قوي الفلاحين...
و أدي الجماهير مستنيه النتيجه...يا رب الكوره ما تجيش في العارضه يا رب...
و إن شا الله تعماريها..و بترولك يتسرق فيها...
و العواف بقي يا أبا الحاج إنت و هو...
و العفو منك إلهي...و الخيبه جائت منا...

عم حوده الكينج و السبق العجيب

If the words not displayed correctly, right click on the page, and from the menu, choose "Encoding" then change it to "Unicode(UTF-8)"

إقرا المقدمه علشان تتعرف بعم حوده...يالا الكينج مستنيك

إن شاء الله هنبدأ حدوته النهارده من حيث إنفرم الآخرون....أه و الله من حيث إنفرم الآخرون
تعالوا معانا نشوف عم حوده الكينج....
أدي الكاميرا بتقرب بشويش من عم حوده النايم علي الكرسي بتاعه أمام المحل بتاعه بردوا...
هدوء تام و صمت مطبق, ما فيش أي صوت غير صوتين...
صوت شخير عم حودة الكينج
و صوت الدبانه الرخمه اللي عماله تلف حولين وش عم حوده...
سيبك من الدبانه مش هي دي قضيتنا....
و فجأه...جاء الواد عضمه صبي المعلم عكوه الجزار...و زعق...
إيه يا عم الكينج مش عيب تنام في عز الضهر؟؟؟؟
فإتنفض عم حودة و قام مفزوع بيقول:
يا ستار يا رب..إنت يا بني من كتر ما عاشرت البهايم بقيت زايـوهم...
فضحك عضمه و قال:
صباحك فل يا عم حوده...نهارك فل إن شاء الله....
فتغيرت ملامح عم حوده الكينج و قال:
خير؟ خير إيه بس..هو إنت يا بني مش عايش في الدنيا؟
فرد عضمه:
لا بصراحه, أنا بتربط في الساقيه من صباحيه ربنا و برجع أترمي علي السريرأخر اليوم زي أجدع تور عندنا...
فقال عم حوده: يا بني عيب عليك إنت مش عارف إيه اللي حصل؟؟؟
عضمه: لا و الله ما اعرف يا عم حوده...ما تنورني الله يخليك...

فرد عم حوده: هو إنت ما سمعتش عن الحادثه اللي حصلت و إتفرم فيها الناس؟
فتهللت ملامح عضمه لما سمع سيره الفرم و قال: قشطه, طالما وصلنا للفرم فسمعني بقي

فقال عم حوده و هو بيتنهد: إسمع يا سيدي.
قال إيه خير الله أما إجعله خير. واحد من دوله عربيه شقيقه...كان جاي
عندنا في زياره...فقام قال أما اللعب بالعربيه شويه....أصل في بلدي فيه نظام و مرور....
فنيجي في البلد اللي الدنيا ملخبطه فيها و نفحط شويه بالسياره...
مع إني مش فاهم يعني إيه نفحط دي...بس و مالوا ما فيش مانع بردوا..
فقام يا واد يا عضمه شاف شويه شباب أرعن...
عضمه: عندك يا عم حوده,إيه بقي أرعم دي؟؟؟
فتلعثم عم حوده حيث أنه لا يعرف معني هذه الكلمه...
هو أصلا قعد سنتين علي ما عرف يقراها..فتهرب من الإجابه و قال:
يا عضمه إنت مخك تخين و مش هتفهم و سيبك من الكلام ده أحسن مخك يتعب
وبعدين إنت مخك لسه عباره عن ديمقراطيه صغيره و كلام أكبر بقي علشان يستسلم

المهم يا عضمه يابني, قام صاحبنا كبرت في دماغه و قام داخل معاهم في سباق...
شويه حرق للبنزين و بعدين جري صواريخ...
و حــــــــــــــــــــــــــــاسب و طخ...و زعيق و صريخ و لا حول و لا قوة إلا بالله...
و إنفرم الناس يا واد يا عضمه بعربيه أخينا ده...
فسأل عضمه بلهفه غريبه: هو ما كسبش السبق؟؟؟
فإحمر وجهه عم حودة الكينج و زعق و قال: سبق إيه يا تور...بقولك الناس إتفرموا...

فأجاب عضمه بإستهجان:
يا عم حودة هي يعني أول مره الناس تتفرم. المهم المنافسات الرياضية و

دورها في توطيد العلاقات بين الشعوب.
أومال إيه! طمني بس يا عم حوده, شبابنا الأرعم هو اللي كسب السبق و لا
إخينا اللي من البلد الشقيق؟ يعني فرحني بقي...

مش كفايه علينا خيبه صفر المونديال و كمان الخروج من كاس العالم...

أدينا مش هنعرف دلوقتي نسافر المانيا و نزوغ هناك زي ما الواد عويضه جوز
أختي عمل في مونديال إيطاليا...
ماهو اللعيبه بصراحه يعني مش بيراعوا ربنا في الشباب اللي نفسه يسافر
للدول المتأدمه,

و كمان الكاس اللي جايه هتبقي في جنوب أفريقيا و أنا كنت عايز اسيب القاره
السمراء حيث إني افضل الشقراوات في القارة العجوز...
سمعت المذيع بيقول أسامي القارات دي في الماشت يا عم حوده...

و إسترسل الواد عضمه قائلا: و مش كده بس يا عم حوده تخيل المنتخب بتاعنا

يروح يدي البطاقه للكوت إفوار.و كإننا بنلاقي البطايق دي في الشارع,

وبيني و بينك يا عم حوده...أنا شايفها قله أصل .
يعني مش الكاميرون أولي بردو؟؟؟ أهو اللي نعرفه أحسن من اللي منعرفهوش.......و

فظفر عم حودة الكينج و كأنه يزيح هموم الدنيا من علي صدره وقال:
أه يا عضمه جيت علي الجرح يا بني.انا معاك بصراحه يعني
دي حتي كوت آفوار دي إديتنا حته جون هناك...بس بصراحه كان إيه مزيكا من
الواد أبو ركبه...هو الواد ده يقرب لأبودراع اللي هو من زنهم يا واد يا عضمه...و و

إيه ده يا عضمه: إنت ناسيتني الناس اللي إتفرموا. دي أرواح ناس يا بني....
عضمه ما فهمش حاجه بس قال: أه صحيح, لامؤخذه يا عم حوده قولي بقي إتفرموا و بعدين...
عم حوده: و لا قابلين يا سيدي.
الرجل اللي فرمهم جري علي المطارو قال إيه.
أصله كان في شارع المطار فلما معرفش يفرمل يا خويا...
قام لاقي نفسه في المطار نفسه و لاقي الناس بتشيلوه علي كتافهم,
بما إنه جاب مجموعه بوينتس في خبطه واحده و لا كأنه أجدع لعيب في لعبه البولينج

فسأل عضمه: و إيه البوليند دي يا عم حوده؟
عم حوده: دي حاجه زي لعبه السبع طوبات كده يا واد يا عضمه بس اموريكاني
المهم يا واد يا عضمه. الناس اقعدت تقوله إنت علي راسنا يا شيخ
و بركاتك يا شيخ كمان مره علشان اللي ما فهمش يفهم
و طبعا إنت عارف يا واد يا عضمه العقال و الجالبيه بيعملوا شغل كبير قوي...
و لما تطلع الدولارات يبقي الناس و اللي جابوهم في الأرض...

و تسمع بقي كلام عسل زي
ما كنش بإيدي و لا برجلي امسكه و لا اسيبه...
وأنا عبد لامؤاخذه المأمور
ودي مقوله إشراك بالله,حيث إنه يجب أن يقول انا عبد مأمور و الله أعلم
ززززز بس ده درس تاني نبقي نقرأه في برنامجكم قول و لا تقل ززززززز

و استرسل عم حوده الكينج وقال: بس يا عم عضمه و الباشا هرب
أو قصدي إحنا اللي سيبناه بمزاجنا علشان هو كسب السبق و إحنا بنقدر الرياضه
و بنشجع اللعبه الحلوه...

فتسائل عضمه ببلاهه: طب يا عم حوده و الناس اللي إتفرموا دول؟
فأجاب عم حوده: إيه يا عضمه إنت اتهبلت و لا إيه؟
دا إحنا ياما ضحينا برجاله علشان لامؤاخذه القوميه العربيه
يبقي مش هنضحي بشويه عالم ماشيين في الشارع,مش عارفين لهم أصل أو فصل,و لا
هم لهم لازمه أصلا و لا لا؟
و نبوظ علاقاتنا مع اشقائنا أومال نشحت من مين؟؟؟ لا لا,عيب عليك يا عضمه
و بعدين إنت عايز إيه يا عضمه,نروح نغزوهم مثلا؟ و الأموريكان هيسبونا يا فالح؟

دا حتي أموريكا دي, ليها في البلد دي قاعده من أكبر القواعد؟
فسأل عضمه:يعني إيه قاعده؟ هي دي اللي بتبقي لامؤاخذه في بيت الراحه؟؟؟
فإحمر وجهه عم حوده الكينج و زاغ بصره من الخضه و قال: إيه, قاعده؟
لا حول و لا قوه إلا بالله..قاعدة إيه يا عضمه,إنت عايز تودينا في داهيه؟؟
و نروح نبيت في تخشيبه جوانتي و نامو؟

لا لا إنسي يا عضمه ما انت طول عمرك تور...هتيجي النهاردة وتحاول تفهم يعني

و بعدين يا سيدي لما الرجل الطيب ده فرم الناس الغلابه...
هنيجي عليه يعني علشان هو مش من عندنا؟ لا يا رجل عيب..
ده حتي الكلام ده ما يبقاش كرم للضيافه...
و بعدين يعني إيه المشكله ما ياما ناس إتفرموا...اللي بيتفرم من أولاد الذوات....
و اللي بيتفرم تحت خط الفقر و اللي بيعيش و يتجنن من كتر ما هو مش عارف
يعمل إيه...و اللي بينتحروا...

و بعدين شوف بقي الإيجابيات في الموضوع ده يا واد يا عضمه
شوف بقي كام فرصه عمل أتوفرت, و كام مكان في المواصلات اللامؤاخذه العامه
أصبح فاضي...
وكام كيلوا سكر إتوفر,
و كام كيلو مكرونه من الأربعه كيلوا اللي الحكومه بتوزعهم علي بطايق
التموين لمحدودي الدخل..
و لا كأننا في بلاد افريقيا اللي بتعاني من المجاعات...

ثم تنهد عم حوده الكينج و قال: و يا واد يا عضمه فكرتني بقول مأثور سمعته
في عركه و انا في شبابي زيك كده
"من لم يتغز بالمطواه, إتفرم بالعجله"
و سأل عم حوده الواد عضمه مبتسما: المهم قولي يا واد هي امك عامله إيه النهارده؟
فأجاب عضمه بفخر: عامله فضله خيرك فرخه مع كوسه يا عم حودة يا كينج
فضحك عم حودة و قال: و إيه اللي خلاها معكوسه (مع كوسه يعني) يا واد يا عضمه
فضحكوا و لا كإن فيه حاجه حصلت و عادي المهم بكره الماتش وإيه اللي هيحصل فيه..

و الأهلي و الزمالك و الملايين اللي من دم الشعب اللي عماله تتفرق علي اللاعيبه و كأنها تكيه

و روساء مجالس إدارات الأنديه و أعضائها اللي بيشرشحوا لبعض علي الفضائيات لحد ما عرونا معاهم

و الأهم من ده كله التصويت علي الدستور و الماده مش عارف رقم كام
و إنتخابات مجلس لامؤاخذه الشعب , اللي تلاقي فيها اللي بيمثل الدائرة اللي إنت منها
مش بيعرف يفك الخط المهم يدفع...

و هيصه و زفه...و صلي صلي..و يا أم المطاهر رشي الملح سبع مرات

و نشوفكم علي خير في حلقه تانيه من حلقات عم حودة الكينج

و حسبنا الله و نعم الوكيل

قد قرأت الخبر الذي جعلني اكتب هذا المقال الساخر

علي موقع العربيه, نقلا عن جريده الوفد المصريه

http://www.alarabiya.net/Articles/2005/10/06/17457.htm